صبايا كيوت

مرحباآ بكـ"
زائرنا الكريم
انت غير مسجل في هذا المنتدى
سجل معنا للتمتع بكافة خدمات وفعاليات المنتدى }~
~{ونرجوا لك تصفح ممتع ومفيد في منتدانا الغالي

WelcoOoMe
صبايا كيوت

    رواية غموض خالد روايه رائعه لاتفووتكمـ

    شاطر

    ·.·•بقـايا جـروح•·.·
    مـِـِـِشرفـَـَـَهـ
    مـِـِـِشرفـَـَـَهـ

    انثى تاريخ التسجيل : 31/08/2008
    عدد الرسائل : 822

    رواية غموض خالد روايه رائعه لاتفووتكمـ

    مُساهمة من طرف ·.·•بقـايا جـروح•·.· في السبت أغسطس 01, 2009 11:06 am

    غموض خالد للكاتبه هدوئي

    * 1 *


    شسوات الحين .؟


    سألت نفسي هالسؤال مليون مرة ,,, محتاااااااار مدري وش اسوي



    سيارة ابوي الله يرحمه وبعتها وسددت فيها شوي من الديون اللي كانت على ابوي ,,, وواحد من الديانه وافتكيت منه باقي الديانه الثانيين وش اسويبهم ,,, من وين اسدد لهم





    4 رجال وكلهم يطلبون ابوي



    تخلصت من اللي اكثر واحد يطلب ابوي باقي ثلاث اقلهم يبي 5000


    اووووه لا صح عمي ,,, عمي ابو مشعل بعد يطلب ابوي والمبلغ اللي يبيه بعد كبير


    كم ياربي كم قال ,,, ايه صح 12 الف ,,, اوووه 12 هذي منين اجيبها



    انا 500 ماعندي كيف عاد ألف 12 مرة



    قربت اصيح



    شسوات الحين .؟



    لو سيارة ابوي كشخة وزينه كان فكت ازمة بس ابوي كان فقير من أصل وماكان له دخل مادي الا من سيارته القرنبع اللي كان يكد عليها هذا غير بيتنا شعبي وبأجار





    وعمي بدل مايكون عون صار فرعون ,,, عمي اغنى من ابوي شوي لكن طماع وماعليه من احد ,,, وعياله كل واحد بحاله ,,, هو صح يجينا من فتره لفتره لكن عشان كلام الناس والدليل انه اذا علمته عن اللي ناقص عندنا يقول مو مهم و مانتم محتاجين له ,,, ويروح مثل ماجا



    وأمي من دولة ثانية وتزوجت شخص من نفس جنسيتها وسافرت لديرتها ,,, طبعا رغم عنها



    شسوات الحين .؟ وين اروح .؟



    سمعت مذن مسجدنا يقوّم للصلاة قمت رايح اتوضى واول مابديت بالوضوء وانا اتذكر انه باقي 5 اشهر بالتمام ويجي صاحب البيت ويطلب الاجار ضاق صدري اكثر,,, انا القاها من وين والا من وين .؟



    من وين اجيبله ماجمّعت شي ووظيفة مالقيت ,,, اصحاب الجامعات مالقوا ,,, ابلقى انا ,,, وانا توني ماخلصت الثانوي



    = خالد ابروح معك



    انتبهت لسالم



    انا = تروح معي وين .؟



    سالم = للمسجد



    تذكرت اني اتوضى



    انا = هاه ,,, ايه ايه يله ,,, توضيت .؟



    سالم = على وضو



    ايه واضح على وضو ,,, هذا صلاته على مزاجه اذا حب يروح راح واذا ماحب ماراح



    توضيت على السريع لأني متأخر وطلعت انا وسالم لكن لقيت الرجال فاضوا من الصلاة



    قلت لسالم = ارجع ارجع ,,, تأخرنا



    وحنا راجعين سمعت احد يناديني التفت لقيت جارنا ابو عبدالله يناديني



    رحت له وسلمت عليه انا وسالم



    ابو عبد الله = وراك متأخر عن الصلاة ياولدي .؟



    تفشلت ,,, شاقوله



    انا = كنت مشغول



    ابو عبد الله = الله يصلحك بس ,,, اممم خالد ابيك تتعشى عندي ,,, لا تقول لا ,,, تراني اعزك وابيك تخاشرني بعشاي



    انا = تسلم ياعم بس ماقدر اترك اخواتي لحالهم في البيت



    ابو عبد الله = بيتي مامن بعد عن بيتك ياولدي ,,, والا تبي تتعذر بس



    انحرجت منه ولا قدرت ارده



    انا = خلاص تم بس بمر البيت شوي واجيك



    ابو عبد الله = خلاص احتريك



    جارنا ابو عبد الله رجال شايب و طيب مسكين فقد عياله من زمان بحادث سياره وهم راجعين من جده للقصيم يعني لو انهم عايشين الحين اكبرهم يمديه متوظف



    سالم = خالد ماشريتلي شنطة ,,, ابي شنطة جديدة



    اففففففففففففف ياذا البلشه ,,, كيف نسيت هالشي ,,, الدراسة الاسبوع الجاي



    انا انتقلت لثالث ثانوي وخلود لأول ثانوي وسالم ثاني ابتدائي وسلمى عمرها 6 سنين

    ومعاذ 3 سنين



    وتوني ماشريت اغراض للمدارس ,,, اصلا من وين لي اشتري افففففففف



    العام احد جيراننا اخذ سالم للسوق من دون علمي وشرا له شنطته وبدلته الرياضية



    والحين لا يمكن اسمح له او لغيره يتصدق علينا ,,, صح اننا فقرا لكن عاد لي كرامه ومابي اخواني يحسون بانهم اقل من غيرهم



    ليتني القى وظيفه بس ,,, يارب فرج همي يارب



    صارخ سالم علي



    سالم = خااااااااااالد



    انا = هااااااااه



    سالم = ابي شنطة



    انا = وشنطتك اللي العام



    سالم = لااااا قديمه ابي وحدة جديدة وفيها رسمة سيارة



    بعد على كيفه يتشرط



    انا = مافيه



    سالم = لييييييييييه



    انا = قلت لك خلاص مافيه وامش خلنا نصلي



    سالم = مابي اصلي



    انا = كيفك اقعد لا تصلي



    رحت عنه ,,, دخلت البيت وصليت ورحت ادور خلود عشان اعلمها اني معزوم



    انا = خلود تراني معزوم ,,, تعشوا لا تحتروني



    خلود = اصلا مافيه عشا ,,, كلها سندويش وجبن



    اففففففففففففف ,,, لازم تذكرني يعني



    يوم جيت ابروح عنها



    خلود = خالد



    التفت لها



    انا = هاااه



    خلود = الدراسه جت وحنا ماشرينا شي



    انا = اووووه خلود حتى انتي من وين لي .؟ سكتي سالم عني اقنعيه يبقى بشنطته وبدلته اللي العام وانا ابحاول اشتري الاغراض المهمه دفاتر وكم قلم



    نزلت خلود راسها



    خلود = بس انا لازم اشتري مريول ,,, انتقلت لمرحلة ثانية والمريول يختلف



    قالتها وهي شوي وتصيح



    يااااربي انا القاها من وين والا من وين الحين



    رحت عنها وانا متضايق ولا ادري وش اسوي



    طلعت من البيت ورحت لبيت جارنا ابو عبد الله



    ابو عبد الله = وراك تأخرت ياولدي



    انا = السموحة كنت مشغول



    ابو عبد الله = مسموح ,,, اقول خالد محتاجين شي تراني بالخدمة ولا تستحي اعتبرني زي ابوك



    انا = تسلم ياعم مانحتاج شي



    ابو عبد الله = انا دورت لك على وظيفة لكن كل الوظايف يبون شهادة ثنوي وشهادة كمبيوتر



    انا = الله كريم



    ابو عبد الله = اكيد مانتم محتاجين شي .؟



    انا = ايه اكيد ,,, الله يطول بعمرك ياعم ,,, الحمد الله مستورة



    جا العشا وتعشينا وانا آكل وكني ماآكل



    طلعت من عند ابو عبدالله وانا مابي ارجع للبيت قلت اتمشى شوي



    طلعت من حارتنا وانا افكر بالهم مبتلش ماادري وش اسوي شكلي مضطر اتسلف ,,, محتاجين دفاتر واقلام ومريول لخلود ومادري ايش هذا غير معاذ متطلباته كثيرة



    ليت ابو عبد الله ماعرض علي المساعدة كان طلبت منه سلف وانا مرتاح ,,, لكن الحين لو اروح له الحين بيعتبرها صدقه موب سلف ,,, يارب فرج همي يارب



    قبل أكد بسيارة ابوي ونلقى دخل ولو بسيط ناكل منه لكن الحين سيارة ابوي وبعتها ,,, بديت اندم ليتني مابعتها ياليت ,,, لكن ان مابعتها مافتكيت من اكثر واحد ناشب بحلقي وكان ماقدرت اسدد شوي من الديون اللي على ابوي



    انتبهت لنفسي ووين انا فيه ,,, لقيت نفسي على الطريق العام رجعت ناوي اروح للبيت



    قبل ادخل شارعنا جاني صالح ولد جارنا ابو محمد



    افففففففف وش يبي ذا



    صالح واحد يحب المشاكل يحس نفسه يمرض اذا ماتحرش باحد



    صالح = وين كنت .؟



    انا = اتمشى عندك مانع



    صالح = تعال تعال وش رايك تروح معنا نتمشى



    انا = انت ومن .؟



    صالح = انا وابراهيم وماجد



    انا = لا موب رايح



    صالح = وراه .؟



    انا = لا وراه ولا قدامه موب رايح وخلاص



    صالح = لا بتروح غصب عنك



    انا = ورني وشلون غصبا عني



    رحت وخليته ولا قالي شي ,,, بعد هذا اللي ناقص ,,, قال غصب عني قال





    انتهى أخر اسبوع من الاجازة وانا الى الحين ماشريت شي للدراسة واصلا مامعي الا 150 ريال ,,, مضطر ابيع جوالي وعساه يكفي بعد



    يوم السبت اول اسبوع من الدراسه رحت العصر وبعت جوالي ومريت اقرب مكتبه من شارعنا وشريت الاغراض المهمه للدراسة والبيت



    باقي مريول لخلود وهذي لازم اخذها معي وانا مامعي سياره شسوات الحين .؟



    بعد صلاة العشا طلعت رايح لابراهيم اطلبه يعطيني سيارته



    بعد السلام



    ابراهيم = ياحيا الله خالد ,,, تفضل ياهلا فيك



    انا = الله يحييك لا مايحتاج مضطر اروح لكن بغيتك بحاجه



    ابراهيم = آمر ياخالد بغيت شي .؟



    انا = الصراحه محتاج سيارتك شوي عندي مشوار ومضطر اروحله



    ابراهيم = ومتى تبيها .؟



    انا = الحين



    ابراهيم = الصراحه عندي مشوار الليله واحتاج السياره بعد



    سكتت وانا احس باحباط



    ابراهيم = طيب خالد اذا اخذتها الحين متى تخلص منها .؟



    انا = الساعة 11 او 12 بالكثير



    ابرهيم = اوووه زين اجل ,,, انا اصلا ماحتاجها الا الساعة 2 وورا ,,, خلاص تقدر تاخذها اصبر اجيب المفاتيح



    وراح دقيقه وجا ومعه المفاتيح



    انا = مشكور ابراهيم



    رجعت للبيت واخذت اخواني للسوق وشرت خلود مريول لها من المرايل الجاهزة



    اف منهم وش هالغلا مريول بـ 370 ريال وبعد المكاسر بـ 350



    وليته مريول زين ,,, من المرايل اللي يقالها رخيصه



    ماطولنا بالسوق على الساعة 11 رجعنا



    وحنا داخلين الحارة لقيت سياره مرسيدس آخر موديل عند باب بيت ابو عبد الله



    ماقد شفتها بحارتنا من قبل الصراحة حلوة هالسياره وواضح ان راعيها رجل اعمال



    صح سيارات صالح وابراهيم ومحمد وبعض شباب الحارة سيارتهم حلوة لكن موب اكشخ من ذي



    لبقت عند بيتنا ونزلوا اخواني



    دخلت البيت معهم والسياره شغاله لأني ناوي ارجعها لابراهيم بعد شوي



    انا = خلود ابرجع السياره لراعيها ,,, قولي لسالم لا يطلع وراي



    خلود = سالم زعلان يقول ماهو رايح للمدرسة بكرة ,,, زعلان عشان الشنطة



    انا = اوووه خليه يزعل مصيره يرضى ,,, وحنا تونا في اول اسبوع عادي لو يغيب



    رحت عنها وطلعت من البيت ,,, انتبهت ان السياره المرسيدس اللي قبل شوي ماهي موجوده بمكانها



    اخذت سياره ابراهيم ولبقتها عند بيتهم و شكرته



    ثم رجعت للبيت



    اليوم اللي بعده انا ماكان لي نفس اروح المدرسه وسالم فعلا كان زعلان ولا راح اما خلود كانت متحمسه للعودة للمدارس وراحت



    طبعا لان خلود بالمدرسه فاضطريت انا اسوي الغدا ,,, العام كانت تسوي الغدا في الليل وتحطه بالثلاجة او تتبرع احدى الجارات و تبلغ خلود بانها ماتسوي الغدا وان غدانا بتجيبه لنا



    على الساعة 11 ونص قام سالم وجاني في المطبخ



    سالم = وين خلود .؟



    انا = خلود احسن منك راحت المدرسه



    سالم = خالد ابي شنطه كل اصدقاي شروا ليش انا ماتشتريلي



    قالها وهو شوي ويصيح



    التفت له احاول افهمه وضعنا وعساه يفهم



    انا = سالم انا مامعي شي مابقي معي الا فلوس شوي واكيد بنحتاجها في اشياء مهمه

    فسحه لكل واحد منا مثلا او اممممم اغراض للبيت او أي شي مهم ,,, الشنطة مو شي مهم خاصة ان عندك شنطة ,,, صح والا لا .؟



    برطم سالم ولا رد علي



    انا = صح سالم والا لا .؟



    دمعت عيونه



    سالم = صح



    كسر خاطري



    انا = سالم انا اذا صار معي فلوس زيادة راح اشتريلك بس اهم شي ماتغيب مثل اليوم

    خلاص لازم تدرس وتجتهد عشان تنجح والا ماتبي تنجح وتصير كبير



    ساكت ومايرد علي



    انا = رح سلّوم رح ألعب مع سلمى ومعاذ وان شاء الله اذا صار معي بشتري لك كل اللي تبي



    طلع سالم من المطبخ ,,, وانا قعدت اكمل شغلي وبالي ماهو معي



    شسوات الحين .؟



    قيمه جوالي مابقي منه الا شوي وسياره ماعندي عشان آكد



    على آذان الظهر رجعت خلود وكنت وقتها انا وسالم وسلمى ومعاذ في حجرة التلفزيون



    خلود = السلام عليكم



    انا = وعليكم السلام



    ركضت سلمى ومعاذ يستقبلون خلود



    سلمى = خلوووووود جبتيلي شي معك



    خلود = اووووووه لا نسيت ,,, كنت جوعانه ونسيت



    التفتت لي



    خلود = خالد تذكرت شي وانا في المدرسه



    انا = يالله ظهر خير ,,, وش تذكرتي .؟



    خلود = سلمى ومعاذ



    انا = وش فيهم .؟



    خلود = اذا كنت انا وانت وسالم في المدرسة سلمى و معاذ وين نوديهم .؟



    انا = مثل العام



    هذي السنه الثانية من تيتّمنا ,,, وكنا اذا رحنا للمدرسة مررنا سلمى ومعاذ ببيت ابو سعد واذا طلعت انا من المدرسة امر بيت ابو سعد وارجعهم معي



    خلود = عند مين تبيهم هالمره .؟



    انا = مثل العام ,,, عند ابو سعد عنده بنات كبر سلمى يلعبون معهم لين نرجع



    خلود = اهاا



    والتفتت خلود هالمره على سالم



    خلود = ساااااااالم بكره ياويلك ان غبت ,,, علمتك ترا



    برطم سالم



    سالم = انا محد يحبني



    خلود = ايه ماحد يحبك



    انا = قم قم صل ,,, ماذن من زمااااااان



    سالم = ماااااابي اصلي ,,, بلعب



    سلمى = انا بروح معك



    خلود = انتي صلي معي



    سلمى = لا ابي مع خالد



    خلود = تصلين مع رجال ,,, كللللللللللللللهم رجال مافيه حريم



    سلمى = ولا حرمة وحده .؟



    خلود = ولا حرمة وحدة



    سلمى = اووووه لا خلاص مابي



    خلود = واحد



    سلمى = لا لا بس



    ضحكت انا وخلود عليها ,,, شكلها مضحك كأن احد يعزمها



    طلعت من البيت صليت ورجعت



    في الليل جانا عمي ابو مشعل يقاله يزورنا



    انا = عم



    ابو مشعل = نعم



    انا = عمي محتاج فلوس ,,, مامعي شي والبيت يطفر هذا غير خلود وسالم محتاجين لأشياء تنقصهم وووو



    ابو مشعل = ووو ,,, وش بعد ياكثر طلباتكم



    انا = عمي المدرسه تطلب علينا اشياء للدراسه اللي يبي هندسة واللي يبي بدله واللي يبي كراسه وماادري ايش الاغراض كثيرة ياعم ,,, هذا غير متطلبات البيت ,,, ومعاذ بعد ,,, وانا مامعي شي ,,, والله مامعي شي



    دخل عمي يده في جيبه وطلع محفظته ومدها علي 1000



    ابو مشعل = خذ هذا اللي اقدر عليه



    انا = بس .؟



    ابو مشعل = ايه بس وش تبي بعد .؟ متزوج حرمتين واصرف على بيتين تجي انت تزود علي بطلباتك اللي ماتنتهي



    انا = 1000 مايكفون



    ابو مشعل = انت ليه ماتشتغل وتفكني من شرك



    انا = وانا لاقي شغل وقايل لا



    ابو مشعل = اشتغل لو حارس



    انا = وظيفة الحارس ماتناسبني



    ابو مشعل بسخرية = ليه ان شاء الله تبي وظيفة بمكتب وتحت مكيف



    انا = ماقدر اصير برا البيت للفجر واخواني بالبيت لحالهم



    ابو مشعل = خالد دبر نفسك ودوّر لك وظيفة ترا هذا آخر شي اعطيكياه



    نزلت راسي وانا اشوف الدنيا بدت تصغر بعيني



    ابو مشعل = يله مع السلامة



    وطلع من دون مارد عليه



    السبت



    انتهى الاسبوع الأول من بداية الدراسة



    انا مارحت للمدرسة في الاسبوع الاول الا مرة اما خلود وسالم كانوا يرحون يوميا



    الحين عاد بدا الجد خاصة اني في اخر سنه من الثانوي لازم اجتهد واجيب نسبه لكن وشلون اجيب نسبه وهذي ضروفي والمبلغ اللي معي ماباقي عليه شي ويخلص من وين اصرف على اخواني وعلي من وين .؟



    = خاااااااااالد



    انتبهت على صالح وهو يناديني ,,, كنا انا وصالح وابراهيم وماجد تونا طالعين من المدرسة ولأن المسافة بين مدرستنا وحارتنا ماهي بعيده وكنا نروح للمدرسه مشي



    صالح= وين وصلت ,,, يسألك ماجد .؟ ,,, وش رايك باللي قاله



    انا = وش قال .؟



    ماجد = اقول اليوم العصر فيه مباراة عند الملعب اللي مجنبنا وش رايك ننضم لهم واكيييييييييد بنفوز



    انا = طيب وانا وش علي



    ابراهيم = كلنا بنلعب وبيجتمعون شباب مدرستنا وسمعت انه فيه من شباب الجامعة بيجون



    انا = مدري اذا كنت فاضي بجي



    صالح = تجي غصبا عنك



    سكتت عنه ,,, عليه اسلوووووووب



    وصلنا شارعنا ولان ماجد مو من حارتنا كمل مشواره لبيته



    انتبهت ان السياره المرسيدس اللي شفتها قبل اسبوع دخلت الحارة ووقفت عند بيت ابو عبدالله ,,, صح كنت ناسيها طوال الاسبوع اللي فات ماشفتها الا مرة



    نزل منها شاب لابس بنطلون اسود وفنيله بيظا مخططه خطوط أي كلام في الصدر وشعره طويل نوعا ما يوصل لكتفه ,,, اول ماشفته مارتحت له مااحب هالنوع من الشباب احسه مغرور



    قال صالح مستغرب



    صالح = خالد !



    كنت اظنه ينادينه



    التفت له احتريه يقول وش يبي



    ابراهيم = صالح هذا مو خالد ولد اخت ابو عبد الله .؟



    صالح = إلا هو ,,, غريبة وش جابه بهالوقت من الرياض



    كني تذكرته ,,, كان يجي هو واهله بالعطل عند ابو عبد الله لكن ماكان بيني وبينه أي كلام لانه ماكان يطول وعلى طول يرجعون للرياض



    انا = هذا خالد ,,, تغيّر ,,, ماعرفته



    قربنا منه قبل يضرب الجرس على بيت ابو عبد الله



    صاح فيه صالح



    صالح = خاااااااالد ويييييين يابو الشباب ,,, سلّم سلّم



    التفت لنا خالد وجا



    خالد = السلام عليكم



    الجميع = وعليكم السلام



    وبعد السلامات



    ابراهيم = وشلونك خالد ,,, تصدق تغيرت ماعرفتك



    خالد = بخير شلونك انت .؟



    ابراهيم = بخير دامك بخير



    صالح = وش جابك بهالوقت .؟



    التفت خالد على صالح وابتسم بسخرية



    خالد = وش هالاستقبال .؟



    صالح = لا يكون صحيح اللي سمعته .؟



    ابراهيم = وش سمعت .؟



    سأل خالد صالح متجاهل سؤاله



    خالد = خالي ابو عبد الله هنا .؟



    تذكرت ان زوجه ابو عبد الله تكون عمة صالح ( اخت ابوه )



    صالح = وانا وش دراني .؟ قلّي ليه جاي ,,, الرياض مافيها مدارس ثانوي عشان تجي تدرس هنا



    خالد = جالس على قلبك انا .؟



    صالح = جالس ببيت عمتي



    خالد = جالس ببيت خالي



    صالح = واذا طلع خالك .؟



    خالد = مالك دخل



    صالح بعصبية = انا مالي دخل !



    و دفع خالد ناوي على هواش



    تدخل ابراهيم



    ابراهيم = هدوا اللعب ياشباب ,,, وشبك صالح خالد ماسوى شي حرام ساكن ببيت خاله



    صالح = وانا مابيه يسكن



    خالد = قلتلك مالك دخل فيني



    صالح = تشوف يانا يانت ببيت عمتي



    خالد = تراك اذيتني بعمتك



    صالح بسخريه = اقووووووووول الى الحين ماشفت ابوك ,,, وش رايك تدرس عنده هااااااااااااااااي



    عطى خالد نظرة لصالح و راح يضرب الجرس على بيت خاله من دون مايرد عليه



    حسيت من نظرته تألم من سخرية صالح



    ابراهيم = هدوا اللعب شباب تعال خالد تعال وش فيك زعلت



    وراح ابراهيم له



    ابراهيم = اقول خالد بما انك بتدرس هنا فيه مباراة اليوم العصر وش رايك تجي معنا تتفرج ولو تلعب معنا بعد احسن



    صالح بعصبية = لا مانبيه يجي



    خالد = معليش مرة ثانية توني جاي من سفر وتعبان



    وفتح الباب خاله



    ابو عبد الله = هلا هلا بولدي خالد هلا



    وسلموا على بعض حسيت ان ابو عبد الله فرحان بخالد ,,, معذور ماعنده عيال



    ابو عبد الله = وينك يابوك الدراسة بدت لها اسبوع شكلك كسلان هههههههههه



    سلمنا على ابو عبد الله



    صالح + ابراهيم + انا = السلام عليكم



    اخيرا التفت لنا ابو عبدالله = هلا هلا وعليكم السلام ياحيا الله الشباب تفضلوا حياكم



    انا = الله يحييك تونا جايين ,,, بس شفنا خالد بطريقنا وسلمنا عليه



    ابو عبد الله = فيكم الخير والله



    ابراهيم = يله نستاذن منك مع السلامة



    مشينا وكل واحد راح لبيته إلا صالح دخل ببيت ابو عبد الله ,,, يوم اقول يمرض ان ماتحرش باحد ,,, شكله ناوي يكمل هواش مع خالد

    ANWAR
    عـِـِـِضـَـَـَو آإسـِـِـِتثنـَـَـَآإئيُ
    عـِـِـِضـَـَـَو آإسـِـِـِتثنـَـَـَآإئيُ

    انثى تاريخ التسجيل : 03/09/2008
    عدد الرسائل : 1082

    رد: رواية غموض خالد روايه رائعه لاتفووتكمـ

    مُساهمة من طرف ANWAR في السبت أغسطس 01, 2009 11:15 am





    يــــاقــلــبــي عليه يكسر الخااااطر خــالـد



    شاااايل هم كل الناااااااااااس




    وااااااااااااااااااو يابقايا جـرووووووح





    بصراااااحـــه روووااااايه عجيبه وحلوووه انتظررر البارت الجااااي





    على نااااااااار





    تسلم لنا ايدج



    ~
    مـع حيرتي شسوي رقيق القلب والنيه ولا ادري بنواياهم

    وراهم وين مارحلو وراهم وهم مافكرو فيه معاهم صادق النيه

    بصدق الحب لهم انوي واعلنها علانيه معاهم صادق النيه

    ~

    ·.·•بقـايا جـروح•·.·
    مـِـِـِشرفـَـَـَهـ
    مـِـِـِشرفـَـَـَهـ

    انثى تاريخ التسجيل : 31/08/2008
    عدد الرسائل : 822

    رد: رواية غموض خالد روايه رائعه لاتفووتكمـ

    مُساهمة من طرف ·.·•بقـايا جـروح•·.· في السبت أغسطس 01, 2009 11:16 am

    * 2 *


    بعد صلاة العصر رحنا للملعب



    فعلا كان فيه شباب كثير مجتمعين ,,, لعبنا المباراه



    المغرب جلست انا وابراهيم نرتاح شوي



    انا = ابراهيم وش كان يقصد صالح يوم قال لخالد الى الحين ماشفت ابوك .؟



    ابراهيم = الصراحة مدري ,,, انا خالد هذا ماعرفه زين ولا اشوفه الا من عطله لعطله



    انا = اهاااا



    ابراهيم = وش رايك نرجع



    انا = نصلي العشا ونرجع



    ابراهيم = طيب صار



    بعد الصلاة رجعنا



    كان شارعنا مليان بالاطفال يلعبون



    دخلت البيت ومالقيت فيه الا خلود ومعاذ



    استغربت انا متأكد اني ماشفت اخواني برا



    انا = خلود وين سالم وسلمى .؟



    التفتت علي خلود مستغربة



    خلود = برا ,,, ماشفتهم وانت جاي .؟



    انا = لا



    وطلعت مرة ثانية من البيت



    وقفت عند الباب ولا شفت احد منهم



    غريب ,,, شفت مجموعه بنات صغيرات يلعبن



    رحت لهن ولا شفت سلمى عندهن ولا حتى سالم



    اففففففففف وين راحوا



    = خااااااااااااالد



    التفتت لمصدر الصوت



    وكانت سلمى راكبه بالسيارة المرسيدس بمكان الراكب ومطلعة راسها من الدريشة وتناديني



    وش جابها هذي هنا



    رحت لها وانتبهت ان خالد بالسياره وبحظنه سالم و يتفرجون على شي ولما قربت كان اللي يتفرجون فيه جوال ,,, وسالم يكركر من الضحك



    سلمى = خالد و خالد هههههههه 2 خالد



    وقفت عند باب الراكب وفتحت الباب وانا معصب



    بطرف عيني شفت خالد يشوفني مستغرب



    انا = سلمى انزلي ,,, سالم انزل اشوف ,,, معليش خالد من اليوم وانا ادورهم والحين وقت نومهم تعرف بكرة مدارس



    سلمى = انا مادرس



    انا = انزلي وانتي ساكتة



    سالم = خالد بس شوي بشوف هذا وبعدين اروح انام



    انا بعصبية = وش تشوف .؟



    اخذ سالم الجوال من يد خالد ومده لي يوريني اللي يشوفه



    سالم = هذا ,,, يضحّك ,,, بشوفه بس شوي



    انا = قلت لك رح البيت



    خالد = خلاص سلّومي رح نام بكرة مدرسة



    سالم = يووووووه ,,, مدرسة مدرسة مدرسة كل يوم مدرسة



    خالد = ههههههههههه ايه كل يوم مدرسة



    نزل ونزّل سالم معه وانا نزّلت سلمى



    قلت لسالم وسلمى



    انا = يله اشوف قدامي



    راحوا يركضون ودخلوا البيت



    التفتت على خالد ,,, لقيته يقفل سيارته ,,, مدري ليه ماني مرتاحله



    انا = بأي سنه تدرس .؟



    التفت لي



    خالد = بثالث ثانوي ,,, مع السلامة



    ودخل بيت خاله ,,, استغربت وش فيه ذا ,,, معقول زعل لأني اخذت اخواني منه



    يوّلي ,,, مو مرتاحله اصلا



    رجعت البيت ,,, وحنا نتعشى سألت سالم وسلمى



    انا = وش كنتوا تسوون مع خالد .؟



    سالم = ماسوينا شي



    سلمى = ركبنا معه السيارة وورانا جواله فيه اشياء تضحك مرررررررره وفيه العاب



    انا = من متى وانتم معه .؟



    سالم = من شوي



    انا = قال لكم شي .؟



    سالم = ماقال شي



    قلت له احذره



    انا = سااااالم



    فعلا خاف



    سالم = قال بأي سنه تدرس وووو قال وقال



    و برطم وسكت



    انا مستغرب = وش قال .؟



    خلود = خالد وش فيك خل سالم ياكل



    انا بعصبية = سالم وش قالك خالد .؟



    سالم = سأل ابوي وينه .؟



    انصدمت ووقفوا اخواني كلهم عن الاكل انسدت نفسهم مثل مانسدت نفسي ,,, سد الله نفسك ياخالد



    انا بألم = وش رديت عليه .؟



    سالم = قلت انا ماعندي اب وام



    بكت خلود بصمت



    سلمى = خالد حنا ليه مالنا ام واب مثل صديقاتي .؟



    قلت لها اصرفها



    انا = يله روحوا ناموا بكرة مدرسة



    وقمت عنهم رايح غرفتي



    خالد ماسأل سالم هالسؤال إلا انه عارف من خاله اننا ايتام



    ليه يستعبط ويسأل بزر ويجرحه بسؤال مثل وجهه



    ان ماوريته بكرة ,,, اكيد بيدرس بنفس مدرستنا وين بيروح يعني



    دخل سالم علي الغرفة ودخل فراشه



    انا = صليت .؟



    سالم = لا



    انا = ليه



    سالم = توني صغير



    انا = لا والله احلف



    سالم = والله



    اففففففف



    انا بعصبية = كيفك اقعد لا تصلي



    في المدرسة دورت على خالد ولا شفته ولا حبيت اسأل عنه



    وحنا راجعين كالعادة انا وماجد وابراهيم وصالح



    ابراهيم = صالح مادرس خالد اليوم .؟



    صالح = من خالد .؟



    ابراهيم = خالد تركي قريبك



    صالح = وانا وش دراني عنه



    ماجد = قريبك



    صالح بعصبية = يخسي ماهو قريبي



    استغربت كره صالح له



    انا = طيب وش فيك معصب



    صالح = زوج عمتي يصير خاله ,,, ياخال ابوي حك ظهري ,,, ماهو قريبي



    سكت وسكتنا ,,, وصلنا شارعنا ,,, وانتبهت ان سياره خالد ماهي موجودة



    دخلت البيت وكان فاضي رحت لبيت ابو سعد عشان اجيب سلمى ومعاذ



    ورجعنا ,,, لقيت سالم رجع البيت وكان لابس بدلته الرياضة بس



    انا مستغرب = متى جيت .؟



    سالم = تو ,,, خالد شف



    وأشر على ركبته وكانت بدلته متمزقة من عند الركبة



    فهمت عليه



    انا = خل خلود تخيطه ماني شاري شي



    سالم زعلان = لااااا ابي اشتري وحدة جديدة



    سالم = لا ماني شاري ,,, خيط هذا وخلاص



    سالم = لا خالد لااااا ابي اشتري وحدة جديدة كل اصدقاي شروا جديدة الا انا وبعدين انت ماشريتلي شنطة بعد مانت شاريلي بدلة ( وقعد يصيح ) ابي وحدة جديدة



    ضاق صدري مامعاي الا 100 ريال اخربها ببدله ,,, وش يفهمه ذا الحين



    انا بعصبية = سالم قلت لا يعني لا



    وطلعت من عنده وانا متضايق شسوات الحين لازم القى وظيفة لازم



    سالم طلباته كثيرة وخلود بعد لكن ساكته عن الاشياء اللي يخصها لكن ادري انها تبي ,,, سشوات .؟



    العصر طلعت من البيت وانا الدنيا مسودة بعيني



    شسوات الحين الشهر اللي فات لقيت وظيفة لكن حارس سوبرماركت و كانت الفترة من العصر الى الساعة 3 في الليل



    اترك اخواني لحالهم من العصر الى الساعة 3 في الليل .؟



    صعبه ,,, ماقدر اتركهم ,,, شسوات الحين ,,, اترك الدراسة واشتغل حارس في الفترة الصباحية والا وشلون



    مالي ألا أكد



    بس وشلون أكد وانا مامعي سياره ,,, ليتني مابعت سيارتي ياليت



    بعد تفكير طوييييييل بهمي



    رجعت البيت وانا مقرر اطلب سيارة احد جيراننا واغيب بكرة عن المدرسة واروح أكد طوال اليوم لين احصل مبلغ يسدني على الاقل يومين ,,, مع اني عارف ان ماورا المكدة مكسب ,,, كل اللي اكسبه يروح بنزين للسيارة ,,,. لكن ان شاء الله ماني كاد الا بوسط المدينة اما اللي يبون توصيلهم خارج المدينة ماني موصلهم ,,, ماعندي حل الا كذا



    وصلت شارعنا على اذان المغرب لقيت اخواني سلمى وسالم يلعبون كالعادة مع اطفال زيهم



    رحت المسجد وصليت ورجعت البيت



    وبعد العشا بفترة طلعت من البيت عشان اطلب سيارة احد جيراننا



    جيت ابروح لابو عبد الله بس تذكرت خالد وشفت سيارته واقفه



    لا لا ماني رايح لابو عبد الله اخاف يطلعلي الخايس خويلد



    ورحت لابو سعد واستأذنت منه سيارته ليوم كامل



    وطلعت من عنده ورجعت للبيت



    وقلت لخلود



    انا = خلود تراني بكرة ماني راجع للبيت الا أخر الليل لا تحتروني لا على الغدا ولا على العشا



    والتفتت لسالم



    انا = سالم اذا رجعت بكرة من المدرسة هات معك سلمى ومعاذ من بيت ابو سعد ,,, مفهوم



    سالم = طيب



    خلود = ليه وين بتروح .؟



    انا = بكد



    خلود = وشلون ماعندك سيارة .؟



    انا = اخذت سيارة ابو سعد



    خلود = وبتتأخر .؟



    انا = مدري على حسب



    يوم الاثنين



    غبت عن المدرسة وطوال اليوم وانا اكد اوصل هذا واوصل غيره اروح جنوب المدينة واوصل شخص لشمالها لكن كل اللي وصلتهم 6 اشخاص



    اكثرهم يبون توصيل خارج المدينة ,,, وليتني كسبت مبلغ زين ,,, ماصفالي من المكدة بسبب البنزين الا 140 ريال



    بعد صلاة العشا كنت تعبان وهلكان ونعسان مانمت اليوم بطوله وفوق هذا جوعان



    خلني ارجع البيت واشوف اخواني يمكن محتاجين شي ثم ارجع أكد مرة ثانية لأخر الليل



    دخلت الحارة وماشفت سالم وسلمى يلعبون مع الاطفال



    دخلت البيت



    انا = السلام عليكم



    خلود مستغربة = خالد ! وعليكم السلام ,,, مو تقول بتجي أخر الليل .؟



    انا = برجع مرة ثانية بس جوعان ,,, سويلي أي شي



    التفتت على سالم وسلمى ومعاذ لقيتهم يلعبون بالعاب اول مرة اشوفها



    سلمى تلعب بعروسه كبيرة نوعا ما



    وسالم يلعب بسيارة على شكل همر كبيرة



    استغربت وسألتهم



    انا = وش هذا .؟



    خلود = وش .؟



    انا = وش الالعاب هذي .؟ من وين .؟



    ترك سالم لعبته وراح شوي وجا ومعه بدلة رياضية جديدة



    سالم بفرح = خالد شف ,,, اليوم اخذني خالد للسوق وشرالي بدلة وسيارة وسلمى شرالها هذا ( وأشر على الدمية )



    انا مستغرب = مين خالد .؟



    سالم بغرور = خالد صديقي



    اخذت مدة عشان استوعب ,,, نقزت شيطاني قدامي ,,, الحين انا غايب عن المدرسة وطوال اليوم تحت الشمس أكد وتعبان وحارم نفسي عن النوم بس عشان اوفر قيمة احتياجاتهم



    وأخر شي ,,,,,,,,,,,,,,,,,,,,,,



    توجهت لسالم بعصبية وعطيته كفففففف وقعدت اضربه



    انا = وش قلت انا ,,, مو قلت لا تاخذ شي من احد



    واخذت اضربه ,,, طلعت كل التعب و الجوع اللي احس فيه ,,, وقعدت اضرب سالم



    اسب واشتم وابرد كبدي فيه



    جت خلود وقعدت تجرّني عنه



    خلود بخوف = خالد بس ابعد عنه خااالد ,,, هو جا استاذن مني ابعد ابعد



    تركت سالم والتفتت لخلود



    انا بعصبية = انتي كنتي تدرين انه راح للسوق .؟



    خلود وهي خايفة مني = ايه



    دفعتها على ورا



    انا بعصبية = وانا رايح اكد لمن .؟ ليش خليتيه يروح لييييييش



    خلود بخوف = قال ابروح مع خالد وسمحتله



    عصبت وعطيتها كف



    انا = ولييييييييش تسمحينله ليييييييييه وانا معلمك اني ابروح اكد ليييييييييه



    بكت ,,, التفتت على سالم اللي الى الحين يصيح



    انا = متى رحت معه ياحماااااااار



    يبكي ولا رد علي



    انا بعصبية = متااااااااااااا



    خلود وهي تبكي = العصر



    سألت سالم



    انا بعصبية = معكم احد .؟



    سالم وهو يبكي وخايف مني = سلمى



    تفاجأت ,,, سلمى بعد ,,, التفتت على سلمى و لقيتها هي الثانية تصيح



    عصبت اكثر ,,, ان ماوريتك ياخالد



    طلعت بعصبية من البيت ورحت لبيت ابو عبد الله ,,, ان ماطحنت عظامك ياخالد ,,, امس جارح الولد بسؤال مثل وجهه والحين يتصدق عليه ,,, ان ماوريتك



    لقيت سيارته واقفة ,,, وضربت الجرس بعصبية ,,, طلع لي ابو عبد الله



    حاولت اكون طبيعي قدامه



    انا = السلام عليكم



    ابو عبد الله = هلا وعليكم السلام ياهلا والله بخالد تفضل تفضل ياحيا الله خالد



    انا = تسلم ياعم لكن ماعليك آمر تناديلي خالد



    ابو عبد الله = خالد رايح للدكان مرسلته العجوز الحين يجي اقلط



    حظه فلت مني لكن وين يروح



    انا = اجل مرة ثانية انا بس بغيت خالد ان جا ياعم قلّه اني بغيته



    ابو عبد الله وهو يشر على مكان وراي = هه هذا هو جا



    التفتت وراي لقيت خالد لابس بنطلون جنز وفنيله سودا ومعه كيسه ,,, ذا مايلبس إلا بناطيل ماعمري شفته لابس ثوب ,,, مالت عليه وعلى شكله



    قرب خالد ووقف عندنا ,,, هالمره مهمل نفسه شعره الطويل صاير حوسه



    خالد بهمس = السلام عليكم



    استغربت صوته متغير



    ابو عبد الله = وعليكم السلام



    والتفت ابو عبد الله لي



    ابو عبد الله = وهذا خالد جا ,,, اقلط ياحياك الله



    انا = تسلم ياعم لكن بغيت خالد بحاجة



    والتفتت لخالد لقيته ماسك راسه بيد ويالله يفتح عيونه كأنه مصدع



    خالد بتعب = بغيتني انا .؟



    ابو عبد الله لخالد



    ابو عبد الله بخوف = خالد فيك شي ياولدي .؟



    خالد = لا ياخال ,,, تعب بسيط ,,, ماعليك



    ابو عبد الله = آكلت دواك .؟



    هز خالد راسه بلا



    ابو عبد الله بتنهيده = الله يهديك



    استغربت دوا ,,, وش دواه



    التفت لي خالد وكأن زاد عليه الألم



    خالد بتعب = اعذرني خالد مصدع وتعبان



    وراح وسلم على راس خاله



    خالد = اعذرني ياخال تعبان وابي انوم ,,, شف هذا وش يبي ,,, ( وهو يشر لي )



    ابو عبد الله = تعشى اول ياولدي



    خالد = ماشتهي



    وراح ,,, ياسلام ,,, الحين انا جاي له يروح ويتركني ,,, مالت عليه احرجني قدام ابو عبد الله



    انا متفشل = جاي له ياعم يتركني ويروح



    ابو عبد الله = والله مادري وش اقولك ياولدي ,,, اعذره وانا عمك خالد عنده صداع مزمن يجيه من فتره لفتره ( تنهد ابو عبد الله وكمل بحزن) بعض الاحيان يفقد وعيه ,,, ادعله وانا عمك ان الله يشفيه ,,, انا وامه مالنا غيره



    انصدمت صداع مزمن ويفقد وعيه



    انا مستغرب = ووووششش صداع مزمن ,,, آآآآ ,,, ليه وش عنده بالضبط ياعم .؟



    ابو عبد الله = والله مدري ياولدي ماجاله هالمرض إلا بعد حادث صار له بالرياض



    صدمه ثانية حادث ,,, واخذت وقت عشان استوعب



    انا = آآآ ,,, الله يشفيه ,,, طيب انا استاذن مع السلامة



    ابو عبد الله = محتاج شي ياخالد اعتبرني زي ابوك لا تستحي



    انا = تسلم ياعم ماحتاج شي ,,, مع السلامة



    رجعت وانا افكر بخالد



    حادث و صداع مزمن لدرجة يفقد وعيه



    اهااااا توني افهم ,,, دايم اشوف على وجهه التعب لكن مانتبهت انه بسبب مرض كنت اظن انه هو شكله كذا ,,, بس صح وش يقصد ابو عبد الله انه ماله وامه الا خالد ,,, يعني خالد ماله اخوان .؟ وإلا وشلون



    اول مادخلت البيت خاف مني سالم وهو مازال عليه آثار الصياح



    جلست بحجرة التلفزيون وانا الى الحين افكر بخالد



    خلود = خالد تبي اجيب العشا الحين .؟



    تذكرت اني جوعان



    انا = ايه



    وحنا نتعشى سألت سالم



    انا = سالم خالد قال لكم شي .؟



    خلود بخوف = خالد خلاص عاد ماصارت ,,, آآآآ ,,, ضربتني و ضربت سالم بس عشان بدله وكم لعبة ,,, ماصارت



    انا = ايه خلاص صار اللي صار ,,, بس انا ابي اعرف وش قالهم خالد



    والتفتت لسالم



    انا = سالم وش تكلمتوا عنه .؟



    سالم بخوف = ماتكلمنا عن شي بس ودانا للسوق ودخلنا الالعاب ولعبنا شوي ورجعنا بس



    انا = طيب هو وشلون عرف انك تبي بدلة .؟



    سالم = انا علمته



    عصبت وجيت بهاوشه لكن وش اسوي اذا الله بلاني باخو بقرة مثل سالم



    انا بعصبية = كللللل ابلععععع



    كملت عشاي وانا افكر فيه



    يضحك مع اخواني ويكلمهم وانا يتهرب مني



    كل ماحاولت اكلمه تركني وراح ,,, ليه .؟



    رجعت السيارة لابو سعد ورجعت البيت انام

    βăŋoTA
    مـِـِـِشرفـَـَـَهـ
    مـِـِـِشرفـَـَـَهـ

    انثى تاريخ التسجيل : 11/03/2009
    عدد الرسائل : 1364

    رد: رواية غموض خالد روايه رائعه لاتفووتكمـ

    مُساهمة من طرف βăŋoTA في الأحد أغسطس 02, 2009 10:15 pm






    سامحت كلّ اللي جرحني و بحتـہَ .. !
    الله يبيحـہَ مآ .... أبي منـہَ / تبريـر
    واللي معـہَ قصّرت .. و إلا جرحتـہَ ؟
    أبيـہَ يسامحني .. على كلّ ... تقصير

    ANWAR
    عـِـِـِضـَـَـَو آإسـِـِـِتثنـَـَـَآإئيُ
    عـِـِـِضـَـَـَو آإسـِـِـِتثنـَـَـَآإئيُ

    انثى تاريخ التسجيل : 03/09/2008
    عدد الرسائل : 1082

    رد: رواية غموض خالد روايه رائعه لاتفووتكمـ

    مُساهمة من طرف ANWAR في الثلاثاء أغسطس 18, 2009 3:56 pm


    ثـــــأأأأأأنـــكـــس انا متااابعـــــه



    ~
    مـع حيرتي شسوي رقيق القلب والنيه ولا ادري بنواياهم

    وراهم وين مارحلو وراهم وهم مافكرو فيه معاهم صادق النيه

    بصدق الحب لهم انوي واعلنها علانيه معاهم صادق النيه

    ~

    ·.·•بقـايا جـروح•·.·
    مـِـِـِشرفـَـَـَهـ
    مـِـِـِشرفـَـَـَهـ

    انثى تاريخ التسجيل : 31/08/2008
    عدد الرسائل : 822

    رد: رواية غموض خالد روايه رائعه لاتفووتكمـ

    مُساهمة من طرف ·.·•بقـايا جـروح•·.· في الثلاثاء أغسطس 18, 2009 6:40 pm

    * 3 *









    الثلاثاء



    طوال اليوم وانا في المدرسة ماشفت خالد ,,, لا يكون الى الحين تعبان عشان كذا مادرس اليوم



    الظهر بعد ماطلعنا من المدرسة وحنا داخلين الحارة سأل ابراهيم صالح بعناد



    ابراهيم = اقووووول صالح قريبك اليوم بعد مادرس ,,, وييييييينه .؟



    صالح بعصبية = ياليل الليل ,,, تفهم انت والا ماتفهم قلتلك ماهو قريبي ,,, وبعدين انا وش علي منه درس والا مادرس



    انتبهت ان سيارة خالد ماهي موجودة



    انا = سيارته ماهي موجودة



    ابراهيم = شكله يدرس بمدرسة غير مدرستنا ,,, قليل ماشوفه وماسولفت معه الى الحين



    انا = صالح هو له اخوان .؟



    صالح بملل = له 4 اخوات ,,, تراكم اذيتونا فيه انت واياه



    ابراهيم = انا ابي اعرف وش بينك وبينه



    صالح = اففففففف اروح للبيت احسن



    وراح



    ابراهيم = وش فيه ذا .؟



    انا = انا ادري



    استغربت كرهه لخالد فعلا وش بينه وبين خالد .؟



    بعد صلاة العصر بفترة وقفت عند باب البيت طفشان



    وكانوا اطفال الحارة يلعبون ومنهم سالم وسلمى



    لقيت ابراهيم واقف مع خالد عند سيارته وطاقينها سوالف



    التفتوا لي وناداني ابراهيم ,,, رحت لهم ووقفت عندهم



    انا = السلام عليكم



    خالد وابراهيم = وعليكم السلام



    التفتت على خالد ,,, شكل صحته اليوم احسن من امس لكن فيه هالات واضحه تحت عيونه ,,, تفاجأت يوم ابتسم لي



    خالد = معصب امس ,,, وش عندك



    تلعثمت شاقوله قدام ابراهيم



    انا = آآآ ,,, انا امس معصب .؟ ما عصبت



    خالد بابتسامه = امس واضح من شكلك انك معصب ,,, لا يكون جالس ببيت عمتك وانا مدري



    ضحكت انا وابراهيم



    انا = شكل صالح مطلع ريحتك



    خالد بتنهيده = أي والله والمشكلة خالي وخالتي ساكتين هو اللي مدري وش يبي



    ابراهيم = ما عليك منه (والتفت لي ) خالد اثر خالد مايدرس عندنا يدرس بمدرسة اهليه ههههه وحنا ندوره بمدرستنا هههههه



    انا = اهااااا



    خالد = خالد



    التفتت له



    انا = نعم



    خالد = انت ماعندك سيارة .؟



    تفاجأت من سؤاله ,,, نزلت راسي



    انا = لا ,,, كانت عندي وبعتها



    رفعت راسي



    انا = ليه تسأل .؟



    خالد = لا مجرد سؤال



    وش فيه ذا اسألته دايم مثل وجهه ,,, مالت عليه



    ابراهيم = وش رايكم نفرفر بالشوارع شوي .؟



    لأن معاذ يومه كله حرارته مرتفعة عشان كذا ماقدر اترك البيت يمكن تحتاجني خلود او شي



    انا = مرة ثانية ,,, ماقدر اروح الحين



    ابراهيم = وراه .؟



    انا = مشغول



    التفت ابراهيم على خالد



    ابراهيم = وانت .؟



    خالد = انا ابمشي الحين للرياض .؟



    ابراهيم = الرياض .؟ والمدرسة ,,, بكرة الاربعاء يالحبيب



    خالد بابتسامه = غياااااااااااب



    ابراهيم = اوووووووه مافيكم خير اروح لماجد وصالح ابركلي



    وراح ,,, التفتت على خالد



    انا = خالد بتسافر للرياض وانت امس تعبان



    خالد باستغراب = ماني تعبان ,,, من قالك اني تعبان



    انا = !!!!!!!!!



    خالد = قصدك امس ؟ ,,, امس تعب عادي وبسيط يمكن لاني مانمت بالامس كله



    انا = والصداع اللي يجيك دايم



    طير عيونه فيني وسكت ,,, وطوّل وهو مارد علي



    انا = وش فيك .؟



    خالد = خالي قاللك .؟



    هزيت راسي بإيه



    خالد بتنهيده = الحمد الله على كل حال ,,, وش تبيني اسوي يعني ,,, اقعد في البيت ولا اسافر لاهلي



    تلعثمت انا = آآآآ ,,, لا ماقصدت ,,, آآآ ,,, امممم



    ماادري شاقوله



    خالد = وش فيك معصب أمس .؟ كنت تبيني



    زين سألني ,,, لازم اعلمه كيف يتأدب عشان مايتصدق على اخواني مرة ثانية



    انا = كم قيمة بدلة سالم والالعاب .؟



    خالد باستغراب = ليه .؟



    انا = انت اللي ليه تشتري لسالم ,,, احد شكالك .؟ احد طلب منك تتدخل في شي مايعنيك .؟



    سكت ومارد



    انا بعصبية = كم .؟



    خالد = هدية لسالم وسلمى



    انا = ماني بزر عندك تكذب علي ,,, انت ماشريت البدلة لسالم الا لما هو علّمك ,,, صح والا لا .؟



    سكت ولاني عارف اني ماقدر اسدد قيمة البدلة والالعاب سكتت عنه



    خالد = تأخرت لازم امشي ( ومد يده لي ) اشوفك على خير ,,, مع السلامة



    انا = توصل بالسلامة ( وصافحته )



    ركب سيارته وشغلها ,,, تفاجأت بسالم وسلمى جوه أول ماركب سيارته



    سلمى = وين بتروح .؟



    خالد بابتسامه = الرياض



    سالم = امك وابوك ليه مايجون هنا .؟



    ضحك خالد = هههههه ان شاء الله اجيب أمي هنا بس هاه لازم تسلم عليها ,,, اتفقنا



    سالم بفرح = اتفقنا



    ومد سالم يده يصافح خالد يقاله توكيد اتفاق ,,, ضحك خالد وصافحه



    تذكرت سؤال صالح لخالد عن ابوه ,,, قلت احرجه



    انا = وابوك ماتبي سالم يسلم عليه .؟



    طالعني وسكت ,,, ابتسمت شكلي احرجته



    انا بابتسامه = ليش ماترد .؟



    خالد = اذا شفته انا خليت سالم يشوفه ,,, وثاني مرة لا تتدخل في شي مايعنيك (والتفت لسالم وسلمى ) يله مع السلامة ياحلوين اشوفكم يوم السبت ان شاء الله



    وراح ,,, انصدمت ,,, وش يقصد بالضبط ( اذا شفته انا خليت سالم يشوفه ) توني ادري انه يتيم ,,, الصراحه ندمت على احراجي له ,,, يالله كيف النعمه اللي هو فيها والسيارة الفخمة اللي معه مخليته كأنه مو يتيم ,,, ليتني ماحرجته ياليت



    الاربعاء



    خلود غابت عن مدرستها عشان معاذ ,,, مع ان جارتنا ام سعد طلبت منها تجيبه عندها لكن خلود عيت



    في الليل كانت سلمى جالسة عندي في حجرة التلفزيون وتلعب بعروستها ,,, فرصة افهمها ان عروستها هذي حرام



    انا = سلمى تخلصي من الدمية هذي



    التفتت لي سلمى موب فاهمه شي



    سلمى = ليه ,,, ابيها



    جلست عندها احاول افهمها



    انا = سلمى شوفي هذي لها عيون كأنها عيون حقيقية والمسي فمها وخشمها شوفي بارز ,,, الملائكة مايدخلون بيتنا لان هذي فيه ,,, فيه عروسات اسلامية مالها ملامح مثل هذي ,,, هذي صارت كأنها صنم ,,, تبين بيتنا يصير فيه صنم .؟



    سلمى = الملائكة مايدخلون بيتنا .؟



    انا = اذا كانت هذي فيه مايدخلون بيتنا



    سلمى = بس ابيها



    انا = انا ابحاول اشتري لك وحدة اسلامية



    برطمت سلمى وكأن ماعجبها الكلام



    انا = خلاص تخلصي منها ,,, شاطرة سلمى ,,, واوعدك اشتريلك وحدة غيرها بس اسلامية



    قمت عنها ,,, افففففف الله ياخذ وجهك ياخالد ورطتني ,,, الحين لازم اخرب الفلوس القليلة اللي معي بدمية ,,, شسوات الحين اففففف



    طلعت من البيت اسولف مع ابراهيم وصالح وكان معهم ماجد



    بعد مرور يومين ,,, فجر السبت



    قمت اصلي الفجر وكالعادة حاولت اقوم سويلموه وعيا يقوم



    طلعت من البيت وتفاجأت بسيارة خالد واقفة قدام باب بيتي ,,, الحمد الله والشكر قضن الاماكن مايوقفها الا هنا ,,, بيوريني انه عنده سيارة والا أيش ,,, مالت عليه وعلى شكله



    بعد الصلاة وقبل ادخل البيت



    = خااااااااالد



    التفتت وكان خالد يناديني ,,, وش يبي ذا ,,, كان لابس بنطلون كالعادة وشكله توه جاي من المسجد ,,, وصل عندي



    خالد = السلام عليكم



    انا = وعليكم السلام



    خالد = بترجع تنوم .؟



    ابتسمت قالها بلهجة اهل الرياض



    انا = تبي شي .؟



    خالد = لا ,,, بس طفشان وماعندي احد اسولف معه ومابي ادخل البيت



    انا مستغرب = ليه ماتبي تدخل البيت .؟



    خالد = البيت مافيه الا خالتي وخالي ماهو موجود



    ضحكت عليه ,,, مطير عيشته صالح



    انا = هههههههههههههه



    خالد بابتسامه = لا تضحك يبليك الله بواحد مثل صالح عمتي وعمتي كأن محد له عمة الا هو ,,, اذا شافني بالبيت وخالي مو هنا قام يتهاوش معي



    انا = لا مابرجع انام



    ابتسم و مسك ذراعي وسحبني



    خالد = اجل تعال نسولف في السيارة



    فتح سيارته وركب وركبت معه ,,, هذي اول مرة اركب سيارته ,,, الصراحة فخمه لكن المرتبه الورانية صايرة حوووووووسه ماينركب فيها كتب ودفاتر وكم بنطلون وفنيله والثوب والشماغ معلقين ,,, والله مادري وشوله هالثوب وهو مايلبسه



    التفتت له



    انا = خالد ليش موقف سيارتك هنا .؟



    خالد = شف صالح وين موقف سيارته



    وكان صالح موقف سيارته بالمكان اللي بالعادة خالد يوقف سيارته فيها قدام بيت ابو عبد الله



    انا = شكله يبي يضايقك ,,, من يوم ماعرفت صالح ماعمري شفته يوقف سيارته هنا ,,, ماعليك منه وانت ماسويت شي غلط ,,, ساكن عند خالك



    خالد تنهد = الله يصبرني عليه بس المشكلة كرّه العجوز فيني



    انا باستغراب = أي عجوز .؟



    خالد = مرة خالي ( وكمل بسخرية ) خالتي



    انا = ليه وش سوت .؟



    خالد = يوم جيت امس من الرياض



    قاطعته



    انا = انت متى جيت .؟



    خالد = امممم اظن الساعة 11 في الليل



    انا = ايه كمل وش سوت خالتك .؟



    خالد = يوم جيت أمس من الرياض لقيتها ناقله غرفتي للملحق تبيني انام واذاكر واحل واجباتي في الملحق ,,, مدري وش غيرها علي ,,, اول ماجيت كانت تعاملني مثل ولدها ,,, والحين ,,, ( تنهد وسكت )



    انا = اكيد احد نقل الغرفة لها هي عجوز ولا تقدر تنقل شي ,,, تتوقع خالك موافق على اللي تسويه .؟



    خالد = لا طبعا ,,, اصلا خالي من يوم الجمعه وهو ماهو فيه ,,, وبعدين مايبيلها تفكير اكيد ياصالح يامحمد او أي احد من عيال اخوها



    انا = طيب وش حادك تدرس هنا ,,, الرياض مليانه مدارس ,,, وغير كذا اهلك كلهم هناك



    غمض عيونه ونزل راسه على الدركسون ,,, مدري ليه حسيت انه متألم ,,, حاولت فيه يجاوبني



    انا = خالد قلي وش حادك تدرس هنا .؟



    رفع راسه وسند ظهره على المرتبة مرة ثانية



    خالد = انا اقدر استاجر شقة ,,, بس اعرف خالي مايبيني اطلع من بيته واستاجر ... بيزعل مني



    انتبهت ان الشمس طلعت وصار لازم اقوم اخواني للمدرسة



    انا = عن اذنك خالد شوي ابروح اقوم اخواني



    خالد بابتسامه = صح تعاااااال وشلون سالم وسلمى ,,, هههه تصدق اشتقت لهم



    انا = هههههه تسلم ,,, سالم وسلمى بخييييييير



    وطلعت ,,, قومت خلود واخذت نص ساعة عشان اقوم سالم ,,, غيرت ملابسي على السريع ويوم تأكدت ان سالم قام طلعت لخالد ,,, فتحت باب الراكب لكن تفاجأت بخالد نايم .... شكله تعبان بس لا يمكن اخليه يكمل نومه على الاقل عشان مدرسته يمكن تروح عليه نومه ,,, ركبت وسكرت الباب ,,, لكن ماقام شكل نومه ثقيل



    انا = خالد ,,, خالد قم



    قام وقعد يتلفت كأنه متفاجئ



    خالد = اووووه شكلي نمت ,,, وينك تأخرت



    انا بابتسامه = سالم وسلمى نومهم ثقيل



    خالد = شف بدا الطلاب يطلعون من بيوتهم



    انا = بعضهم يرحون بدري



    = صدتكم ,,, وش تسووون .؟



    نقزت انا وخالد متفاجئين ,,, وكان ابراهيم مدخل راسه من عند دريشة الراكب ( من عندي ) وفاجأنا



    انا = بسم الله الرحمن الرحيم ,,, تنحنح ياخي



    ابراهيم = هههههههههه ماذا تفعلان ايها الخالدان .؟



    خالد = نسرق ,,, من وين طلعت انت .؟



    ابراهيم = من تحت الارض



    خالد = ماخبرك شيطان



    ابراهيم = يله عاد



    خالد = ههههههههههههه امزح معك يارجال



    ابراهيم = بتروحون مشوار هالحزة ,,, الحين وقت مدارس



    انا = ندري ,,, اففففففف متى نفتك من هالمدارس



    ابراهيم = هااااااانت ,,, هذي آخر سنه ياسلااااااام ,,, تصدقون ماني مصدق



    شفت صالح جاي لنا ,,, اووووووه ,,, التفتت لخالد



    انا = خالد شف صالح جا



    خالد متضايق = اشوفه



    وصل صالح وعلى وجهه ابتسامه سخرية ودخل راسه من عند دريشة السواق ( من عند خالد )



    صالح = اشوفكم مجتمعيييييييين



    والتفت على خالد وتوسعت ابتسامته



    صالح = قايم بدري اليوم ,,, ليه مارتحت بالنوم .؟



    خالد بعصبية = وش قايل لخالتي أنت .؟



    صالح = هههههههههههههههاي ,,, حلوة ذي خالتي ,,, اقووووووول متى جيت



    خالد = مالك دخل



    همس باذني ابراهيم



    ابراهيم = بدت الهوشة



    صالح = قلتلك ياخي من البداية لا تجي عندنا اذلف لابوك وعيش عنده ,,, وفكنا من وجهك ,,, بس انت دجاجة ماتفهم



    طوال ماصالح يتكلم اخذ خالد ربع ورقة من احد الدفاتر اللي ورا ودخلها بفمه واخذ يعلجها ولما انتهى صالح من كلامه تفل الورقة بوجه صالح ,,, كلنا تفاجأنا من حركته ,,, لما استوعب صالح الحركة ,,, فتح باب خالد بعصبية وهجم عليه ,,, مال خالد علي بسبب ركوب صالح عليه ,,, وصاروا يتهاوشون ,,, حاولت ابعد صالح عنه ,,, وابراهيم دار حولين السيارة و حاول يجر صالح ,,, حاولنا نبعدهم عن بعض لكن صالح اخذ يضرب خالد كفوف وخالد يحاول يضربه و يدافع عن نفسه ,,, لين اخيرا قدرنا نبعدهم



    صالح بعصبية = ان ماوريتك يالكلب ,,, ( وسحب يده من ابراهيم ) فكني



    خالد بعصبية = مالكلب غيرك



    صالح = قسم لردها لك



    وراح وهو يسب ويشتم



    انا = ابراهيم رح له



    ابراهيم = خلك مع خالد



    وراح يلحق صالح ,,, التفتت على خالد ,,, كانت انفاسه سريعه ,,, أخذ منديل و مسح خشمه عن الدم ,,, كان باب خالد مازال مفتوح و بسبب الهوشة منزل رجل وحدة بالارض

    تفاجأت بسالم واقف قدام خالد وهو يتفحصه ,,, متى طلع ذا



    سالم = ليه تتصارعون انت وصالح ,,, اشووووووف ورني



    وركب بحضن خالد وشنطته على ظهره



    انا = سالم متى طلعت .؟ يله رح مدرستك



    مارد علي مازال يتفحص خالد



    خالد وانفاسه سريعه = سالم يله رح مدرستك لا تتأخر



    ونزّل سالم من حضنه ,,, والتفت لي



    خالد = وانت بعد رح مدرستك



    انا = وانت .؟



    خالد = وانا بعد



    انا = خالد ابعد عنه تراه يحب المشاكل



    نزل خالد من السيارة وفتح الباب اللي ورا واخذ الثوب والشماغ المعلقين



    خالد = ابروح اغير واغسل وجهي ماراح اطوّل



    ودخل بيت خاله



    دخلت البيت حاولت اقوم سلمى وعيت تقوم شلتها ومعاذ يمشي وراي ,,, طلعت خلود وراحت مدرستها ,,, نزلت سلمى ومعاذ ببيت ابو سعد ,,, ورجعت البيت وقفلته ,,, جاني خالد ولأول مررررة اشوفه لابس ثوب ولا وبعد كااشخ بشماغ



    خالد = خالد شفتك تودي سلمى وهي نايمه لهذاك البيت ,,, ليه ,,, ومن البزر اللي كان معك .؟



    انا مستغرب = بزر .؟



    خالد = ايه البزر اللي كان يمشي وراك ,,, من ولده .؟



    انا بابتسامه = هذا اخوي



    خالد مستغرب = لك اخو غير سالم .؟



    انا = ايه



    خالد = تصدق توني ادري ... طيب ليش وديت سلمى لهذاك البيت ... ومن بيته هذاك .؟



    انا = اجل اخلي سلمى لحالها في البيت



    خالد = دخلها الروضة



    على باله كل الناس قادره مثله



    انا = ومعاذ ادخله الروضه بعد .؟ و تراك بتأخرني عن المدرسة ,,, مع السلامة



    مشيت عنه ,,, لكن هو مسك ذراعي



    خالد = تعال بوصلك بطريقي



    انا = لا مايحتاج مدرستي قريبة



    خالد = إلا يحتاج ,,, اركب اركب



    ركبت معه ووصلني وراح ,,, دخلت الفصل ,,,



    لحظة لحظة وشلون نسييييييييييت ,,, مو كني سمعت صالح يقول لخالد اذلف لابوك ,,, حركة خالد نستني ,,, وشلون يعني ,,, يعني خالد موب يتيم مثل ماكنت متوقع

    ·.·•بقـايا جـروح•·.·
    مـِـِـِشرفـَـَـَهـ
    مـِـِـِشرفـَـَـَهـ

    انثى تاريخ التسجيل : 31/08/2008
    عدد الرسائل : 822

    رد: رواية غموض خالد روايه رائعه لاتفووتكمـ

    مُساهمة من طرف ·.·•بقـايا جـروح•·.· في الثلاثاء أغسطس 18, 2009 6:41 pm

    GAGA كتب:




    يــــاقــلــبــي عليه يكسر الخااااطر خــالـد



    شاااايل هم كل الناااااااااااس




    وااااااااااااااااااو يابقايا جـرووووووح





    بصراااااحـــه روووااااايه عجيبه وحلوووه انتظررر البارت الجااااي





    على نااااااااار





    تسلم لنا ايدج



    لعيـــــــونج يا
    أنــــــــوار

    ANWAR
    عـِـِـِضـَـَـَو آإسـِـِـِتثنـَـَـَآإئيُ
    عـِـِـِضـَـَـَو آإسـِـِـِتثنـَـَـَآإئيُ

    انثى تاريخ التسجيل : 03/09/2008
    عدد الرسائل : 1082

    رد: رواية غموض خالد روايه رائعه لاتفووتكمـ

    مُساهمة من طرف ANWAR في السبت أغسطس 22, 2009 11:01 am

    ثـــأأأأأنــــــــــكــــــــس



    ~
    مـع حيرتي شسوي رقيق القلب والنيه ولا ادري بنواياهم

    وراهم وين مارحلو وراهم وهم مافكرو فيه معاهم صادق النيه

    بصدق الحب لهم انوي واعلنها علانيه معاهم صادق النيه

    ~

      الوقت/التاريخ الآن هو الخميس ديسمبر 08, 2016 9:53 pm